विश्रामगड–पट्टा किल्ला

प्रमोशनल ट्रेक | रविवार, २२ जून २०२५

सह्याद्री मित्र संमेलन — वर्ष ३ रे

पावसाळ्याच्या आगमनाने सह्याद्रीच्या वाटांना पुन्हा हिरवाईची पालवी फुटली होती… धुक्याची चादर, रानवाऱ्याची साद आणि पावसाने न्हालेल्या डोंगररांगा ट्रेकर्सना साद घालत होत्या.

याच निसर्गरम्य वातावरणात २२ जून २०२५ रोजी विश्रामगड–पट्टा किल्ला प्रमोशनल ट्रेक आयोजित करण्यात आला.

नाशिकहून ३२६ आणि संगमनेरहून १४० हून अधिक, असे तब्बल ४६६ हून अधिक ट्रेकर्स, निसर्गप्रेमी आणि विद्यार्थ्यांनी या उपक्रमात सहभाग घेतला. दोन शहरांमधून निघालेले हे शेकडो पाय एकाच दिशेने चालत होते—इतिहासाकडे, निसर्गाकडे आणि सह्याद्रीशी नव्याने नाते जोडण्यासाठी.

विश्रामगड… छत्रपती शिवाजी महाराजांच्या पदस्पर्शाने पावन झालेला, पुरातन इतिहासाची साक्ष देत आजही दिमाखात उभा असलेला किल्ला. त्याच्या प्रत्येक वाटेवर इतिहासाची चाहूल आहे आणि प्रत्येक वळणावर सह्याद्रीचे नवे रूप उलगडते.

पावसाळी दिवस असल्याने परिसर हिरवाईने नटला होता. धुक्यात हरवणाऱ्या डोंगररांगा, ओलसर मातीचा गंध, पावसाच्या सरी आणि गडावर पोहोचण्याची धडपड—या सगळ्यांनी हा ट्रेक केवळ एक भटकंती न राहता इतिहास आणि निसर्गाचा अनुभव देणारा उत्सव बनवला.

४६६ हून अधिक सहभागींच्या उत्स्फूर्त सहभागाने विश्रामगड–पट्टा किल्ला ट्रेकने सह्याद्री मित्र संमेलनाच्या तिसऱ्या पर्वाची चाहूल अधिक दूरवर पोहोचवली.

इतिहास पावलांना दिशा देत होता…
आणि पावसाळी सह्याद्री मनाला हाक देत होता.